Sri Ramaprabhakaran

நூன்முகம்
அன்புடையீர்,
நலம் பல. ஸ்ரீ குரு ராஜர் தன்னருளால் இன்று ஸ்ரீ அப்பண்ணாச்சாரியார் அருளிய “ஸ்ரீ பூர்ண போத” எனத் துவங்கும், “ஸ்ரீ ராகவேந்திர ஸ்தோத்திரம்” தமிழில் சீரிய முறையில் மொழி மாற்றம் செய்யப்பட்டு வெளிவருகிறது.
சமஸ்கிருத மொழி உச்சரிப்பில் தவறு நேர்கின்ற போது மந்த்ரஹீனம் ஏற்படுகிறதே என வருந்தும் மொழியறியா தூய பக்தர்களுக்காகவே முறையான தமிழில், தெளிவான முறையில், அழகான வடிவோடு, இன்று ஸ்ரீ ராகவேந்திர ஸ்தோத்திரம் வெளிவருகிறது.

இந்த முயற்சிக்கு முழு முதற் காரணம் பிரதி வியாழக்கிழமை தோறும், ஜெயா ப்ளஸ் சேனலில் ஒளிபரப்பான “ஸ்ரீ ராகவேந்திர விஜயம்” தொடரின் இயக்குனர் திரு. D MAG. சரவணன் அவர்களே.
இவர் காட்டிய வற்றாத ஆர்வமே இந்த நூல் உருப்பெறக் காரணமாய் அமைந்தது. பல்வேறு இடங்கட்கு, படப்பிடிப்புக்காகச் செல்லும் போது, பல துறைகளைச் சேர்ந்த ஸ்ரீ ராகவேந்திர பக்தர்கள், அவரிடம் விடுத்த வேண்டுகோள், அவருடைய அயரா உழைப்பின் காரணமாக வடிவம் பெற்றது.

ஸ்லோகங்கள் வரி பிறழாமல் செம்மையாக இருப்பினும் பக்தி பிரிப்பதில் நூலுக்கு நூல் எண்ணிக்கை வேறுபடுகிறது. சில பிரதிகளில் 32 பத்தி எனவும் சிலவற்றில் 33 எனவும், சில 35 சில 36 எனக் காணப்படுகின்றன. எனவே பக்தர்கள் பத்திகளின் எண்ணிக்கை குறித்துக் கவலைப் படவேண்டாம். மூல ஸ்லோகத்தின் வரி வடிவம் ஒரு எழுத்துக் கூட மாறவில்லை என்பதே சிறப்பு. அநு ராகவேந்திர ஸ்தோத்திரத்தின் முதலிரு வரிகளான “பூஜ்யாய ராகவேந்திராய” என்ற இரு வரிகள் மட்டுமே ஸ்ரீ அப்பண்ணாச்சாரியாருடையவை. அடுத்து வருபவை ஸ்ரீ யோகீந்த்ர தீர்த்தர் அவர்களால் எழுதப்பட்டவை எனவும் ஒரு குறிப்பு காணப்படுகிறது. 

எனவே ஸ்ரீ அப்பண்ணாச்சாரியாரால் அருளப்பட்ட ஸ்லோகங்களின் தமிழ் வடிவை ஒரு பகுதியாகவும், ஸ்ரீ குருயோகீந்த்ர தீர்த்தர் அருளிய “துர்வாதி” எனத் துவங்கும் பாடலின் தமிழ் வடிவை அடுத்தும் சேர்த்துத் தந்துள்ளோம்.
இரு பெரும் மஹான்களின் ஸ்தோத்திர வடிவில் நமக்கு அருளிய வரமே இந்த துதி மனதாரத் துதிப்போம். அன்புடன் துதிப்போம். பொருள் உணர்ந்து துதிப்போம். ஸ்ரீ குரு ராகவேந்திர ஸ்வாமிகள் அருள் எல்லோருக்கும் கிடைக்கட்டும்.

அன்புடன் : இராம. பிரபாகரன், வேலூர்